Europan aritzeko aukerak sua piztu du Osasunan. Oso gertu ikusten dute, eta hor segitzen du aukerak. Baina gaur, Sevillan, ura bota dio Betisek suari. Itzali ez du itzaliko helburu polit hori lortzeko aukera, baina pausoa eman du Osasunak atzeranzko bidean. Horixe dakar galtzeak.

Epailearen lanarekin ez dira gustura nafarrak. Raul Garcia kalera bota du 61. minutuan, txartel gorria aterata, eta gero, bi penalti eskatu dituzte Osasunakoek. Eskatzea libre. Horixe pentsatuko zuen epaileak, ez baitu alerik adierazi.

Azkenean, Ruben Castrok sartutako golak (33. minutuan) hiru puntuak eman dizkio Betisi. Ez jaisteko helburua lotu dute etxekoek. Osasunak aspalditxo gauzatu zuen helburu bera, eta orain, beste baten bila ari da. Gaur itzali samar geratu den suak bizi-bizi argitu behar ditu asmoa gauzatzeko indarrak hurrengo partida heltzerako.

http://www.youtube.com/watch?v=Chkqx4FXnKs