Futbola begi bakarrez ikusten dutenek begira dezatela gaur San Mames aldera. Futbolean jokatzeko eredu bakarra dagoela esaten dutenek ikus dezatela Athletic eta Mallorca partida. Bi eredu, bi jokatzeko modu, eta biak eraginkorrak.

Emaitzak agintzen duen bitartean futbolean, mila bide egongo dira asmo hori gauzatzeko. Eta denak dira futbola. Ez bakarrik eredu bat, begi bakarrez begiratzen dutenek zabaltzen duten bezala.

Bi aulkietan daude eredu ezberdin horien erabiltzaileak. Bielsak eredu bat du gustuko. Caparrosek bestea. Eta biak eraginkorrak direla erakusteko Athletic dago. Caparrosekin emaitza onak lortu zituen, Bielsarekin ere bai. Biek balio dute emaitza ona lortzeko bidean.

Gero, ikuskizunaren aldertitik begiratuta, bat bestea baino ikusgarriagoa dela ezin da ukatu. Baina ikusgarritasunaren izenean ezin daitezke baztertu ikusgarriak ez direnak, futbola ez direla burla moduan erabiliz.

Bielsa eta Caparros aurrez aurre. Bi eredu. Batek edo besteak irabaziko du, edo berdindu. Partidaren ondorenean, tentazio handiegia batzuentzat norbere gustuak besteen gainetik jartzeko, baina inork ez dezala emaitza bere usteak indartzeko eta besteenak baztertzeko erabili. Dena da futbola.  Eta futbolaren ezaugarri bat aniztasuna da.