Ezin du Realak goranzko jauzia egin. Gaur ere beste aukera bat galdu du. Getafen galtzaile izan da (1-0). Bederatzi minutu falta zirela sartu du gola Realak berak. Iñigo Martinezek bere atean, Bravori ihes egin dio baloiak nahigabe bera jo eta gero.

Orain zabalduko da taldeak ez zuela galtzea merezi. Egin dituela partida okerragoak. Bigarren esaldiarena ondo dago, baina aurrenekoa, oker. Getaferen areara ondo eta askotan heldu da Montanierren taldea, baina denetan kale egin du. Edo jaurtiketa txarra, edo kontrol txarra, edo pase txarra, edo erabaki okerra… Hainbeste akats egiten duenak ezin du ezer onik merezi.

Asteon esan du entrenatzaileak, hitzaldi batean, jokalariek gabeziak dituztela erdiraketak egiten eta erremateak gauzatzen. Gaur arrazoia eman diote.

Partidako fitxa, hauxe.

Sailkapenean, 33 punturekin segitzen du Realak, eta 12. da behin-behinean.