Jaitsiera hitzetik hortzera. Denboraldia hasi zenetik. Orduan, orain baino arrisku handiagoa zuelako. Eta orain, ez jaisteko helburua lotu gabe duelako, oso gertu egon arren.

Reala eta jaitsiera elkarri lotutako bi izen izaten ari dira. Ez jaistea da helburu nagusia, eta hori gauzatu artean, ez da harritzekoa hitzetik hortzera ibiltzea. Eta sailkapenean azpialdera begiratzea, nahiz eta 9 puntuko aldea eduki azken hirugarrenarekin.

Bihar dauka aukera beste izen bat, beste helburu bat, beste zerbaitetaz hitz egiten hasteko. Nahiz eta bihar Getafen irabazita ere (18:00), asmo nagusia lortzeko puntuak batzeko geratuko zaion oraindik. Anoetako lau garaipenen bolada onari, etxetik kanpokoa kateatu behar dio. Aukera dauka bihar, eta aukeraren bila atera beharra dago.

Aurkariak ere esan du aukera dela, jaitsieraren mamua neurri handi batean ia behin betiko urruntzeko. Realekoek ere esan dute aukera ona dela jauzia egiteko. Hitzek, batzuenak eta besteenak, zelaian hartu beharko dute ekitzen itxura.

Puntu bat aurretik da Reala, eta bihar gailenduz gero, beste aurkari zuzen bat utziko luke atzean Realak. Partida bat, eta zenbat helburu. Phillipe Montanierrek jarri du berea: “Ezinbestekoa da etxetik kanpo emaitzak lortzea”.

Aukera gauzatzeko zain badaude, seinale txarra. Bere ezaugarri eta bereizgarri onetan oinarrituz, Realak nortasuna azaldu behar du bihar.

Asteazkeneko partida ere gogoan

Datorren asteazkenean ere Liga izango duenez Realak (Levanteren aurka, Anoetan), Montanierrek horren arabera egin du deialdia. Hala, kanpoan utzi ditu Llorente eta Pardo. Mikel Gonzalez ere ez da izango, txartelak pilatuta dituelako. Gaur, Realeren jiran hedatu den zurrumurruaren arabera, Ifran hasieratik ari daiteke.

Lehen itzulian 0-0 egin zuten Anoetan. Bideo honetan duzue partida horretako laburpena:

http://www.youtube.com/watch?v=17DB6gN-BcQ