Ikusirik zein duen aurkari Osasunak bihar, eta kontuan izanik aurreko igandean Athletici irabazi zietela gorritxoek, nork ez du pentsatu Zaragozatik hiru puntuak ekartzea?

Azkenak dira espainiarrak, eta ia astebururo oso itxura txarra ari dira ematen. Ondorioa: beraien aurka jokatu behar dutenentzat ia-ia betebeharra da irabaztea. Halakoa ez den beste edozein emaitza porrotaren parekotzat hartzeko arriskua daukate.

Osasunari dagokio orain Zaragozan aritzea (18:00). Eta jakina, irabazi egin behar dio, eta oso erraz, gainera. Ez dira alferrik bat azkena, eta bestea  seigarren sailkatua.

Orain arteko denak taldeen inguruetako jarioak izaten dira. Osasunaren jiran ere sortu dituzte, aurkaria zein den ikusita. Baina futbolean, beti hasten dira partidak berdin: hutsean, eta alde banatan 11 jokalari daudela. Edozer gerta daitekeela, sailkapenak, boladek, jokoak eta beste hainbat ezaugarrik kontrakoa esaten duten arren. Argi esan du Mendilibarrek, eta garbi: “Gu baino hobeto aritu daitezke bihar, eta irabaz diezagukete”.

Hala gertatzen bada, edo berdindu egiten badute, zalaparta izango da nagusi Osasunaren bueltan. Kritika txarrez jantzitako zalaparta. Aldiz, irabazten badu, txalo gutxi joko dizkiote. “Normala da azkenari irabaztea”.

Sei jokalari falta

Mendilibarri sei jokalari faltako zaizkio bihar: Miguel Flaño zigortuta dago txartelak pilatzeagatik, eta lesionatuta dira Masud, Lolo, Lekic, Kike Sola eta Ibra. Ricardo, Satrustegi eta Calleja ere ez dira egongo, baina entrenatzaileak kanpoan utzi dituelako. Aldiz, Timor eta Etxaide deialdian daude.

Bideo honetan, lehen itzuliko partidan izandako golak (Osasunak irabazi zuen, 3-0):

http://www.youtube.com/watch?v=illVTa9gimM