Gaur justu zazpi egun, eta zozketa egin zenetik, lehoiak beldurra zion deabruari. Baina astebete geroago, deabruak dio beldur lehoiari. Izua sartu zion Ametsen Antzokian. Ametsa amesgaizto bilakatzeraino.

Harrezkero, lehoia pozarren dabil. Deabruari hor konpon! Gaur jarriko dira berriz aurrez aurre. Lehen deman lehoiak irabazi zuen, baina deabruaren azken uneko akzio hura… Aste osoko pozak kezka apur bat ere badu berarekin. Deabrua beti deabru.

Bietako zein izango den garaile? Erantzunak ematen hasteko ordua jarrita dago: 19:00ak. Lekua ere bai: San Mames. Lehiaketak atondu du eszenatokia: Europako Liga. Saria, gozoa: final-laurdenak. Aurrekaria, erakargarria lehoiarentzat: 2-3. Nahikoa ote?

Lehoia ala deabru? Baloiak erantzungo du, neurri handi batean. Biek nahi dute, biek behar dute. Baina bakarrarekin jokatzen da. Duela astebete, lehoiak erakutsi ere ez zion egin deabruari. Gorde egin zuen, “nirea da!”. Baina deabruak badaki baloia ezinbesteko duela hurrengo jolasera igarotzeko. Eta lehoiak ere gauza bera daki.

Lehoia eta deabrua, berez, gai dira baloia zulatzeko. Baina gaurko lehoia eta deabrua ezberdinak dira. Maite dute baloia. Athletic lehoiak ala Manchester United deabruak eramango dute jolasean segitu ahal izateko?

Baloia. Lehoien eta deabruen jostailu gustukoena. EFE