Betiko galdera izaten da kanporaketak jokoan daudenean: joanekoan 1-0 galtzea edo 1-0 irabaztea emaitza ona al da? Erantzun zehatzik ez dauka galderak, batzuetan ona, eta besteetan txarra izaten delako emaitza hori. Gaur gauean, bi erantzun gehiago izango ditu.

Txapeldunen Ligako final-zortzirenetan, itzuliko bi partida jokatuko dituzte, eta bietan, emaitza bera izan zen joanekoan: 1-0. Halaxe irabazi zieten Basileak eta Marseillak Bayern Munichi eta Interri, hurrenez hurren. Bi bideo hauetan dituzue egun hartako bi golak:

http://www.youtube.com/watch?feature=player_embedded&v=u2mXKjqruVg
http://www.youtube.com/watch?v=n_595D4Z6lk

Bayern-Basilea (20:45)

Alemaniarrek galdua zuten indarra berreskuratu zuten larunbatean, Bundesligan. Hoffenheim egurtu egin zuten (7-1). Gaurkoari begira, Bastian  Schweinsteiger itzuliko da zelaira, lesioa osatuta, eta jokalari ona izanik, onerako antzeman behar luke Bayernek. Bestelakoan, Mario Gomez ariko den edo ez zalantzaren itzalean dago, min hartuta delako.

Suitzarren artean, Park Joo Ho egoera berean dago, zalantzan bai edo ez. Ez dira ariko Voser eta Chipperfield, min hartuta.

Inter-Marseilla (20:45)

Bi taldeak dabiltza eskas Ligetan, eta gaur irabazle denak argia ikusiko du iluntasunean. Galtzaileak, aldiz, ilunpetan segitu beharko du.

Interren, Maicon jokatzeko moduan da, joan zen ostiralean berriz aritu eta gero, bi astez minez egon ondoren. Aldiz, Ranocchia eta Alvarez ez dira osatu, eta Chivu ere ez da egongo, txartelak pilatuta dituelako.

Marseillan, albiste onak: Valbuena, Remy eta Mbia osatu dira. Gignac ariko den edo ez zalantzaren itzalean dago.

Bihar, beste bi partida

• Real Madril-CSKA Mosku (1-1 joanekoan)
• Chelsea-Napoli (3-1 joanekoan italiarrak garaile)