Zenbat izen Athletic handi honen oinarrian. Denek merezi dute aipatzea, buruan denak dauzkat, baina bat nabarmenduko dut: Marcelo Bielsa. Ezin baita bazterrean utzi obra hau hizpide hartzean. Berak ezarri du Athletic honen estiloa, eta bera da, horrexegatik, arduradun nagusia.

Old Trafforden bildu diren 8.000 zale zuri-gorrietako batek baino gehiagok nahiko zuen zelaira atera, eta Bielsa bizkarrean hartu. Zelaian buelta emateko. Eta Bielsa oihukatzen ere irudikatuko zuen, “Athletic, karajo!” esanez. Bere garaian, Newellsekin txapeldun izan zenekoa berriz ere errepikatuz.

Txapelik gabeko txapelduna da oraingoz Athletic, baina gaur gauekoa txapeldunen erakustaldia izan da.  Dantzan ibili du Manchester United handia (2-3), Bielsaren Newells gazte hark Boca, River eta gainerakoak ibili zituen bezala. Gero, txapeldun izan zen. Bide berean darama Athletic gazte hau ere.

Estiloa, eredua bera dira. Ikasleak aldatu zaizkio irakasleari, jakina. Baina ordukoak eta gaurkoak jarrera berarekin dabiltza maisuari segika.

Baloiaren jabetza, erritmo bizia, presioa, erasoan aritzea, lanerako gogo nekaezina… Athletic, karajo! Horrekin guztiarekin menderatu du United Ametsen Antzokian. Ametsa ez da esnatu. Datorren ostegunera arte iraungo du, gutxienez. Orain, ohera bidean, futbola maite dugunok egingo dugu amets Bielsaren Athleticekin.