Bartzelonak lana osatzeko aukera ona dauka gaur, zaleen aurrean (20:45). Txapeldunen Ligako final-zortzirenetan, itzulikoa jokatuko du Bayer Leverkusen aurkari duela, eta joaneko emaitza bikaina biribildu baino ez du egin behar (1-3).

Pep Guardiolak ezingo ditu atera honako jokalari hauek: Puyol, Abidal, Thiago eta Alexis, berriki min hartutakoak baitira. Villa, Afellay eta Fontas lehenagotik daude aritu ezinda.

Alemaniarren artean ere bada zulorik. Minez daude Ballack, Adler, Sidney Sam eta Barnetta.

Apoel-Lyon (20:45)

Eguneko beste partidan ez daude kontuak hain argi. Apoel menderatu egin zuen Lyonek Frantzian (1-0), baina emaitza estua da. Txapelketako ezuste handienak beste balentria bat egin nahi du gaur gauean.

Apoelen ez da ariko Helio Pinto, txartelak pilatuta dituelako, baina joanekoan egon ez ziren bi jokatzeko moduan dira: Marcelo Oliviera eta Aldo Adorno. Aldiz, Trickovski izango den edo ez, zalantzak daude.

Lyonen, Gourcuf ez da joan ere egin Ziprera, eta Mensah ere ez dago jokatzeko moduan. Aldiz, Lovren osatu egin da.