Txapeldunen Ligaren txanda da gaur eta bihar. Gaur, final-zortzirenetako bi partida jokatuko dituzte, itzulikoak: Arsenalek Milan hartuko du Londresen, eta Benficak Zenit Lisboan.

Joanekoan, Milanek erraz menderatu zuen Arsenal (4-0), eta gauzak bere-berean joaten badira, fnal-laurdenetan behar luke. Beste kanporaketan, Zenitek estu irabazi zion Benficari (3-2).

Arsenal-Milan (20:45)

Arsenalen jokalari asko faltako dira gaur: Diaby, Arteta eta Benayun min hartuta daude, eta  Rosicky ariko den edo ez dudatan dago. Lehenagotik daude min hartuta beste hauek, eta ez dira izango: Andre Santos, Squillaci, Ramsey, Djourou, Coquelin, Mertesacker eta Wilshere.

Milanek ere izango ditu hutsuneak jokalariei dagokienez: Seedorf eta Prince-Boateng min hartuta daude, Ambrossini zigortuta txartelak tarteko, eta Gattuso ere aspalditik dago jokatu ezinda.

Benfica-Zenit (20:45)

Benfican, ezin izango dute jokatu Aimarrek eta Garaik. Erdilaria minez dago, eta atzelaria zigortuta txartelengatik. Zeniten ezingo du Arxavinek jokatu. Duela hilabete utzi zion Arsenalek, baina ingelesekin jokatu du Txapeldunen Liga sasoi honetan. Bukharovek ere ez du jokatuko; ezta Dannyk ere, portugaldarrak ez baitu gehiago jokatuko denboraldi honetan, eskuineko belauna txikitua baitu.

Bihar, beste bi partida

• Bartzelona-Bayer Leverkusen (3-1)
• Apoel-Lyon (0-1)