Osasunak 7 puntura dauka jaitsiera. Bada aldea. Baina atzo atzeko hiru taldeek izan zituzten emaitzak ikusita (Zaragozak galdu, eta Racing-Sporting partidan berdindu), gaur Granadari irabaziz gero, behin-betiko utziko lioke atzera begiratzeari. Beste ikuspegi bat azalduko litzaioke parez pare: kolore bizikoa.

Irabazteko Granada menderatu beharko du, eta gaur egun, ez da lan samurra hori. Abel entrenatzaile denetik, goranzko bidean da; emaitzak onak izan ditu, eta jokatu ere ondo jokatzen du. Egin kontu, gaur kanpotarrek irabazten badute, Osasuna berdinduko lukete sailkapenean.

Mendilibarren adierazpen batzuk: 

• “Granada da orain ondoen dagoen taldeetako bat. Oso ondo dakite zertara ari diren jokatzen”.
• “Kanpoan kosta egiten zaigu partidetan sartzea, baina etxean ez, eta gaur hori baliatu behar dugu. Eta horretarako zaleek txistu egin behar badigute, egin dezatela, horretarako ere badaude eta”.
• “Raul itzuliko da, eta gauzak ematen dizkigu. Baina garrantzitsuena da pozik dagoela. Aurpegira begiratu besterik ez dago”.

Abelen adierazpen batzuk: 

• “Iruñean puntuak batzea erronka da guretzat. Osasuna taldea da, jokalari denek egiten dute lan”.
• “Presioa eta intentsitatea funtsezkoak izango dira”.