Duela urtebete eta hiru hilabete, 2011ko urtarrilean, Liverpoolek jokalari bat fitxatu zuen. Aurrelaria. Golegilea. Andy Carroll (1989) du izena, eta Newcastle zuen lehengo taldea. 40 milioi euro ordaindu zuen Anfieldeko klubak. Ingalaterran inoiz egin den zortzigarren fitxaketa garestiena da jokalari ingelesei dagokienez.

Premier Leaguen 2006tik 2009ra jokatu bazuen ere, oso gaztea zen oraindik. Gero, Newcastle jaitsi egin zen Mailaz, eta 2009-2010 denboraldian, Championshipen edo Bigarren Mailan, asko nabarmendu zen: 39 partidetan 17 gol sartu zituen. Premier Leaguera itzuli zen taldea sasoi horretan, eta iazko denboraldian, 20 partidetan 11 gol egiteko gauza izan zen.

Gehiago ez zuen jokatu bere betiko taldean. Liverpoolek eraman zuen. Etorkizun handiko jokalaria da, eta gorriek aukera ikusi zuten herrialdeko gazte distiratsuenetakoa bere taldean sartzeko. Baina Liverpoolen ez du neurri handirik eman. Aurreko denboraldian, 9 partida jokatu zituen, 2 gol sartzeko.

Eta oraingoan ere ez dabil fin. Lehiaketa guztiak kontuan hartuta, 42 neurketa jokatu ditu, eta 8 gol sartu. Golak sartzeko aukera garbi dezente huts egin ditu, eta zaleen iseken jomuga izaten ari da.

Gaurtik aurrera, akaso, zaleek beste iritzi bat izango dute Carrollen inguruan. Berak sartu du gol erabakigarria. Ingelesen umore berezkoarekin, “azkenean!!” esango diote. FA Cupen izan da, Evertonen aurkako finalerdian, Liverpooleko derbian. Wembley estadioan.

87. minutuan sartu du, eta Liverpool finalean da. Hori bai, aurretik pare bat aukera garbi ere huts egin ditu. Horixe da Liverpooleko Andy Carrollen jarduna. Newcastlen denak sartzen zituen.

http://www.youtube.com/watch?v=Ea9-OIlKo8o