11 zelaian, eta hamaika harmailetan

Data: 2012/06/23

Euskal Herriko selekzioak lehen partida jokatuko du gaur Eslovakiaren aurka, Anoetan (16:30). Egun osoko festa dago antolatua.

Festa eta aldarrikapena. 11 jokalari zelaian, eta hamaika lagun harmailetan eta kalean, hainbat oihu ozen egiteko Euskal Herriko selekzioaren alde.

Egun osoko festa egongo da Anoeta estadioan eta inguruetan (Donostia). Historikoa da eguna, emakumezkoek aurreneko aldiz jokatuko dutelako Euskal Herriaren izenean. 22 hautatu dituzte Garbiñe Etxeberria eta Iñigo Juaristi entrenatzaileek. Eslovakia izango dute aurkari, FIFA sailkapenean 39. postuan dagoen selekzioa.

Euskal Herria Kirolak, ESAIT eta Euskararen Gizarte Erakundeen Kontseilua dira antolatzaileak. Aurkezpen egunean, hitzorduaren helburua zein den esan zuten: “Gure selekzioaren neurketa historiko honek aukera emango digu herri gisa garen bezala agertzeko”.

Goizetik hasiko da festa, eta egun osoz luzatuko, hainbat ekitalditan banatuta. Hauxe da egitaraua:

10:30etik aurrera (estadioaren kanpoaldean). Irrien Lagunak, jolasgunea, txokolate jana, gune estaliak jan eta edanarekin, kale animazioa, joaldunak, batukada, trikitilariak, Debako elektro-txaranga, euskal jokoak, tailerrak eta DJ Bull.

11:00etatik aurrera (estadioaren kanpoaldean). Porrotx, Largabista eta Marikalanbre, Irrien Lagunekin dantzatzeko eta kantatzeko aukera eta Txan magoa.

13:00etan (estadioaren kanpoaldean). Ekitaldi nagusia.

13:30ean (estadioaren kanpoaldean). Ze Esatek taldearen kontzertua.

15:00etan (estadio barruan, sarrerarekin). Kantaldia Alex Gatibu, Anje Duhalde eta Naroa Amaiurrekin. Puntako kirolarien arteko norgehiagoka. Emakumezkoen futbolean aitzindari izandakoen omenaldia.

16:30ean. Euskal Herria-Eslovakia nazioarteko partida.

Atsedenaldian (estadio barruan, sarrerarekin). Penalti jaurtiketak Asier Riesgorekin. Hainbat elastikoren zozketa.

Egun historiko honetan, Euskal Herria ordezkatuko dutenak hauek dira:

Atezainak: Ainhoa Tirapu (Athletic) eta Maria Goñi Saez (Lagunak).
Atzelariak: Irene Paredes Hernandez (Athletic), Leire Landa Iroz (Atletico Madril), Laura Gomez Gutierrez (Barcelona), eta Estibaliz Aizpurua Nieto eta Ane Bergara Artieda (Reala).
Erdilariak: Elisabeth Ibarra Rabancho, Iraia Iturregi Sustatxa, Amaia Olabarrieta Elordui eta Arrate Orueta Olabarria (Athletic), Marta Unzue Urdaniz (Barcelona), Vanesa Gimbert Acosta (Espanyol), eta Aintzane Encinas Gomez, Ainara Herrero Pagaldai, Maite Lizaso Campos eta Larraitz Lucas Martin (Reala).
Aurrelariak: Nekane Diez Tapia, Gurutze Fernandez Callejo eta Irune Murua Cuesta (Athletic), Maialen Zelaia Mendizabal (Reala), eta Eunate Arraiza Otazu (Lagunak)
Kontzentraziora gonbidatuak: Amaia Prebende (defentsa, Donapaleu), eta Maite Etxarren (aurrelaria, Donibane Garazi)