Athleticek 2 eta Realak 0. Izan zitekeen Athleticek 2 eta Realak 2. Izan zitekeen Athleticek 4 eta Realak 2.

Baina zalantzarik ez du uzten partidan gertatuak. Athleticek irabazi egin du. Realak ere sartu ditu bi gol, baina Mateu Lahoz epaileak oker hartu ditu erabakiak bi jokaldi horietan. Eta lehen zatian Athleticek beste pare bat gol sartu izan balitu ere sartu duenaz gain, inor ez zen harrituko. Horra lehen esaldiko ‘izan zitekeen’ bi horien azpian gertatuak.

Bestelakoan, ederra izan da derbia. Erritmo bizian jokatua. Lehen zatia zuri-gorrientzat izan da, bigarrena txuri-urdinentzat. Futboleko hainbat ezaugarriz aritzeko parada ederra ematen du gaurkoak, baina futboleko agintarien buru-gogorkeriak beste zerbaiti buruz hitz egitera behartzen gaitu. Berandu dabiltza, berandu dabiltzanez. Baloi batek goleko marra pasatu duen edo ez jakiteko ez dago telebista baino lagun zehatzagorik. Baina ez, epaileen ikusmena zorrotzagoa omen. Bada, gaurkoena ez da zorrotz ibili.

Realak sartu du gola, partida 1-0 zenean. Velak egin du, baina marrazainak eta epaileak ez dute ikusi gola izan dela. Balekotzat eman izan balute zer gertatuko zen gero, inoiz ez da jakingo. Hauxe izan da jokaldia:

http://www.youtube.com/watch?v=Co9KevhR1sI

Bigarren bat ere sartu du. Cadamurok. Baina marrazainak jokoz kanpokoa adierazi dio, baloia Athleticekoek pasatu badio ere. Horretan ere aurrekoaren ondorio bera: ontzat eman izan balute, gero zer pasatuko zen inork ez daki.

Orain arte azaldutakoak ez du zalantzarako lekurik uzten. Eta orain azalduko ditugunek ere ez. Gure ustez, hauek izan dira partidan zehar nabarmendu beharrekoak:

• Lehen zatian, Athleticen zelai-erdikoen presioak ito egin du Reala. Baina Reala bera ere ito da. Baloia elkarri eman beharrean, eraman egin zuten edo eramatzen saiatzen ziren, zuri-gorrien presioa eraginkorrago bihurtuz.
• Lehen zatian, Bravoren geldituek utzi dute bizirik Reala.
• Lehen golean, Susaeta area barruan sartu da, eta Zurutuzak ez dio segitu segitu behar zion lekura arte.
• Lehen zatian, Realeko erdiko atzelarien eta hegalekoen artean zuloa zegoen, eta ederki baliatu ditu espazio horiek De Marcosek.
• Partida osoan, deigarria izan da Realak ia korner denak motzean atera dituela.
• Bigarren zatian, Athleticek ez du hainbeste presionatu zelai-erdian, eta Reala erosoago ibili da. Hobeto eta azkarrago mugitu du baloia. Jokalari gehiago ere pilatu dituzte txuri-urdinek esparru horretan, eta aldeko izan dute hori.
• Bigarren zati horretan, Athleticek ez du baliatu kontraerasoan ateratzeko aukera.
• Realari zerbait falta izan zaio Athleticen area inguruan min emateko.
• Reala ondoen zela sartu du Athleticek bigarren gola, eta hor bukatu dira kontuak.