Praktikoena
OSASUNA 1
RAYO 0
Hiru puntuei esker, jaitsieratik atera da Mendilibarren taldea.
- Osasunaren ezaugarriak zein diren ezaguna da. Horietako baten berri eman du Rayoko entrenatzaileak, Paco Jemezek, gaur bertan: “Intentsitate handienetakoa duen taldea da”. Intentsitatea, grina, taldeko lana, sakrifizioa… orain, beste hau ere gehitu: praktikotasuna. Gaur, 1-0 irabazi dio Rayori, bosgarren aldiz jarraian ez du golik jaso, eta jaitsieratik atera da. Zertarako hasi lore-jokoetan?
- Praktikoa da Mendilibar. Ez zaizkio korapiloak gustatzen. Eta zer egin behar du emaitza onak lortzen ari bada jokalari multzo bat? Hurrengo partidan ere, 11ko bera atera. Horixe egin du entrenatzaile euskaldunak. Praktikoa baita bera.
- Rayo menderatzeko oinarria bete du taldeak: ez du golik jaso. Bestea, berak sartzea zen, eta aurreikusten zen bezala, bat sartu dio. Nahikoa. Hiru puntu gozo-gozo.
- Partidaren hasiera ederra izan da; txoroa batzuentzat, joan-etorrien ikusgarritasuna hala izendatzen baitute horiek. Txorakeri horretan nagusi izan da Osasuna. Asmatu egin du, eta Rayok ez. Kike Solak sartu du gola (5. minutuan), dena ondo egin eta gero: erabaki taktiko ona hartu du (desmarkea zuloa zegoen lekura); teknikoan ere biribil (baloia ondo eraman, ondo jarri, eta hobeto jaurti). Gol bikaina. Txorakeriarik txoroena izan da.
- Golak ez du aldatu Osasunaren laneko moldea: erasoan, betikoa, eta defentsan ere bai. Presioa goian, baloia galdu berritan batez ere. Horren ondorioa da presioa gainditzen badu aurkariak zulo eta leku asko dituela aurkariaren atzelarien bizkarrean. Hori baliatu du Rayok, hegaletatik hausteko (batez ere bere eskuin aldetik). Baina asmatu, ez du asmatu jokaldiak amaitzen.
- Bigarren zatian, aldatu egin da Osasuna. Lerroak atzeratu ditu, Rayori aukera gutxiago emateko. Erosoago egon denik ezin esan, bukaera aldera komeria dezente izan dituelako. Gainera, erasoan ere ez du baliatu Rayok utzitako zuloa. Gauzak horrela izanda, garbi dago nolakoa izan den garaipena, gozoaz gain: erabat praktikoa. Gogoratzen Liga hasierarekin? “Ondo jokatzen dugu, baina puntuak ezin ditugu lortu”, entzuten zen aldagela barrutik.
- Aurrera begirakoa, ez hain ona, edo kezkagarria: hiru aldaketa egin ditu Mendilibarrek, eta hiruretan, lesioak tarteko: Sisi, Kike Sola eta Cejudo dira mindunak. Ez dadila ezer larririk izan.