Historikoa
VALENTZIA 2
REALA 5
Sekulako garaipena lortu du Realak. Bigarren zatian sartu ditu lau gol, ederki baliatuz aurkaria 10 jokalarirekin zela.
- Hiztegi bat balego adiera oneko adjektiboak bakarrik biltzen dituena, hiztegi osoa erabili beharko genuke gaur Realak Valentzian egin duena azaltzeko. Liburua oso-osorik, adjektibo guztiekin. Hori da hori erakustaldia! Emaitzak eta jokoan gertatuak bat egin dute: 2-5.
- Valentzia bigarren zati osoan jokalari bat gutxiagorekin aritu da (Jonas kaleratu du epaileak 41.minutuan), eta Realak bigarren zatian jo du kolpea mahai gainean. 1-1 hasi da bigarrengo erdia, eta 2-5 bukatu. Tentazioa: ez da harritzeko emaitza, ezta jokoa ere, jokalari bat gehiagorekin aritu delako. Errealitatea, tentaziotik at: Realak oso-oso gutxitan baliatu izan du aurkaria 10ekin aritzea; bikain jokatuz (erasoan eta defentsan) lortu du txikizioa; eta egundoko nortasuna erakutsi du. Gainera, 11×11 zirela ere, nagusi izan da Montanierren taldea, bigarren zatiko baliabide berdinak erabiliz.
- Eraginkortasuna ere nabarmendu egin behar da, nola ez. Bost gol sartzea handia da, eta etxetik kanpo, gainera. Golak sartzen bete-bete asmatu dute jokalariek, beste askotan ez bezala. Lehen zatian ez bezala ere bai, erdi horretan kamuts antzean ibili baitira. Edo Diego Alves atezaina bikain. Izan ere, aukera garbi askoak moztu ditu Valentziako atezainak.
- 11koan, artista guztiak batera jarri ditu Montanierrek. Malagan ere egin zuen, eta han ere irabazi. Rayoren aurka, beste horrenbeste. Gaur ere bai. Horrekin ez dugu esan nahi artistekin beti irabaziko duenik, berdindu eta galdu ere egingo duelako, baina bidea errazten duela ezin da ukatu. Baloiaren lagunekin irria erabatekoa izateko aukera gehiago dago.
- Presioarena ere nabarmendu egin behar da. Bigarren zatian, kasu. Baloia goian galdu orduko, Valentzia estutzera jotzen zuten jokalariek. Makina bat alditan berreskuratu du baloia taldeak horrela, edota aurkariari galduarazi egin dio. Gehiagotan erabili beharko zukeen presioarena taldeak.
- Baloiaren jabetzan jarraitutasuna izan du gaur taldeak. Denbora luzez jokatu du antzera, eta ez beste askotan bezala, gorabeherekin. Jokoan erregularra izan da gaur. Jakina ez dela erraz lortzen beti, eta batzuetan zaila dela, baina edozein objektu maldan behera bakarrik joaten da, eta txarrerako izan ohi da objektu hori norbaitek maneiatzeko ahalegina egiten badu.
- Norbait hori, Realaren kasuan, entrenatzailea izan daiteke. Gaur ere eman behar zaio berea, irabazi izanaren zatian parte du, dudarik ez, galtzen duenean berea izaten duenean bezala. Baina kanpotik begiratuta ematen du taldeak daramala entrenatzailea; hau da, edozeinek esango balieke jokalariei “hartu baloia eta jolastu!”, liteekena izango zen gaurko joko eta emaitza bera lortzea. Gertatzen dira halakoak futbolean: talde onek edozein entrenatzailerekin jokatzen dute ondo. Realak baditu baliabide interesgarriak, eta egun ona dutenean (gaur bezala), edozein azpiratzeko gai dira, aulkian dagoena edozein izanda ere. Pena baliabide on horiek ia-ia kasualitatez jarri behar izatea entrenatzaileak (akordatzen Malagako 11koarekin?). Pena, denbora asko galdu zelako aurretik.
- Irabaztean, erosoa da kritika txarrak ezkutatzea. Eta gaur bezala irabaztean, are erosoagoa. Baina gaurko erakustaldiak ez ditu beste miseria batzuk ezkutatuko. Hor daude eta.
- Bukatzeko, golegileak, garaipen historiko honetan: de la Bella, Mikel Gonzalez, Ifran, Agirretxe eta Vela (penaltiz).