Futbolean ez du balio atzera begiratzeak. “Hau egin nuen halako egunean, eta gaur berriz egingo dut” bezalako esaldiak asko entzuten dira, baina ez dute piperrik ere balio. Asmoak baino ez dira. Ona da, jakina, asmo onak izatea buruan, baina gero, egin egin behar dira zelaian.

Zertara datorren hau? Realak Valentzian du gaur partida, Valentziaren aurka. Bada, gaurkoaz hitz egin den bakoitzean, joan zen sasoiko kontuak aipatu dituzte jokalariek eta inguruak. Orduan ere, Kopatik kanpo geratu berritan jokatu zuen Mestalla zelaian, eta irabazi egin zuen. Orain ere, Kopatik at dago, eta Valentziara doa. Azkar egin dute ekuazioa denek, eta iazkoa gogoan, gaur ere irabazi egingo dela ziurtatu dute. Batez ere, jokalariek.

Halako adierazpenak egin dituzte asteartetik hona. Lotsagatik egin ere. Hori esatera behartuak daudelako, Kordoba apalak lotsarenak atera eta gero. Gaur erakutsi beharko dute hitzak baino gehiago direla. Aukera ederra daukate zelai gaiztoan eta aurkari arriskutsua parean dutela. Gaur, orain eta hemen, horretxek bakarrik balio du. Eta die.

Valentzia indartsua da etxean. Lehiaketa guztiak kontuan hartuta, hamar partida jokatu ditu, eta zortzi irabazi, bi berdindu. Realean, hutsuneak albiste. Zelai erdia kamuts duela joan da Montanier. Illarramendi ez dago, txartel horiak pilatuta zigortua delako. Jakin ba ze aukera egingo duen entrenatzaileak. Malagan bezain ausart izateko adorea edukitzea ez litzateke albiste txarra. Nahiz eta orduko lan onak ez duen ziurtatzen gaur ere ona izango denik. Esana baitago gorago: gaur, orain eta hemen.