Antzoki hau berezia da. Amets egiten da. Amets egin izan dutelako askotan bertara joan izan direnek. Zaharra da. Hala salatzen du ‘old’ ingeleseko izenak. Zaharrak historikoa esan nahi du kasu honetan. Zenbat amets egin izan ote dira bertan?

Gaur gauean, Athleticek ere amets egin nahi du Old Trafforden. Zergatik ez? Bere antzezlana jokatu nahi du. Erakutsi nahi du futbolaren antzoki ederrenean obra bikaina taularatzen ari dela denboraldi honetan. Gaztea eta lotsagabea. Zuzendari bikainak ehundutako lana: Marcelo Bielsak.

Artista izaera ez dute galdu nahi jokalariek. Antzoki zaharrean artista izaten segitu nahi dute. Iraizozek baloiak geratu edota urrundu nahi ditu. Llorentek golegile aparta dela erakutsi. Muniainek eta Javi Martinezek talde honen geroa direla. Iturraspek gero eta jokalari sendoagoa dela. Eta horrela, artisten zeregin guztiak osatu arte.

Europako txango honek ‘The end’ izatea ez dute nahi, eta horretarako, ezinbestekoa zaie ametsetan jarraitzea. Futbolean jokatuz, Manchester United historikoari adierazi nahi diote “ez esnatzeko, ametsetan ari direlako”.